তুমি  মোৰ আকাশত মেঘ হৈয়ে থাকা

তুমি কেতিয়াও বৰষুণ হ'ব নালাগে
মোৰ আকাশত মেঘ হৈয়ে থাকা
বৰষুণ হলে তুমি তুমি হৈ নাথাকিবা
চঞ্চল মেঘহৈ উৰি উৰি আকাশে আকাশে ঘূৰি
কৈ যাবা আলসুৱা মনৰ বাতৰি

বৰষুণ হলেই তুমি হেৰাই যাবা মোৰ পৰা-
হেৰাব তোমাৰ স্থিতি
হেৰাব তোমাৰ গতি
তুমি কোন অচিনাৰ কবি!
আন্ধাৰৰ হাঁহাকাৰশুনি
কয়লাৰঙী মানুহবোৰ মাতাল হোৱা দেখি
বৰষুণ হৈ আহিব খুজিছা নামি?

তুমি মোৰ আকাশত ডাৱৰ হৈয়ে থাকা

ডাৱৰৰ মাজেদি ৰামধেনু আঁকি
মোৰ আকাশ বৰ্ণময় কৰি
তুমি মেঘ হৈয়ে থাকা
কিন কিনএজাক বৰষুণ নহবা
মোৰ চোতাল বোকা কৰা 
বৰষুণ হলেই পানী হ'বা
পানী হলেই বৈ যাবা
বৈ গলেই হেৰাই যাবা
হেৰাবলৈ তুমি বৰষুণ নহ'বা
মোৰ আকাশত তুমি মেঘ হৈয়ে থাকা